ລາງວັນແຫ່ງປີ ຂອງນັກສ້າງສັນເນື້ອຫາດິຈິຕອລໃນລາວ

Digital Content Creator ຫຼື ຜູ້ສ້າງສັນເນື້ອຫາ ຫຼື ຄຣີເອເຕີ ໃນສະບັບຂອງລາງວັນ ​Muan Awards ນີ້ ໝາຍເຖິງ ບຸກຄົນ ຫຼື ທີມ ທີ່ຜະລິດເນື້ອຫາດິຈິຕອລຕົ້ນສະບັບ (Original Content) ຢ່າງຕໍ່ເນື່ອງ ບໍ່ວ່າຈະເປັນສາຍອາຫານ, ທ່ອງທ່ຽວ, ໄລຟ໌ສະໄຕລ໌, ບັນເທີງ, ໂມເດວ ຫຼື ດົນຕີ ເຊິ່ງຂະບວນການຜະລິດຕ້ອງມີສ່ວນກ່ຽວຂ້ອງກັບປະເທດລາວ ແລະ ມີຄົນລາວເປັນຖານຜູ້ຊົມຫຼັກ. ຄຣີເອເຕີຕ້ອງນຳສະເໜີຕົວຕົນຢ່າງມືອາຊີບ, ມີພາບລັກເປັນແບບຢ່າງທີ່ດີ ແລະ ປະຕິບັດຕາມມາດຕະຖານນະໂຍບາຍຊຸມຊົນ (Community Standards) ຂອງແຕ່ລະແພລດຟອມ ໂດຍໃຊ້ຄວາມຄິດສ້າງສັນ ແລະ ການເລົ່າເລື່ອງເພື່ອສ້າງຄຸນຄ່າ, ຄວາມມ່ວນຊື່ນ ຫຼື ແຮງບັນດານໃຈໃຫ້ຜູ້ຕິດຕາມ ພ້ອມທັງໂຕ້ຕອບກັບຜູ້ຕິດຕາມຢ່າງສ້າງສັນ.